Ndërhyrje artistike – Off Season Collective

Rezidenca e artistëve Off Season është platformë eksperimentale për hetimin e turizmit nëpërmjet hulumtimit dhe praktikës artistike. E krijuar nga një kolektiv i punonjësve të kulturës nga Kosova, Shqipëria, Rumania dhe Gjermania, ajo eksploron specifikisht marrëdhënien e turizmit me zhvillimin dhe trashëgiminë e Evropës Juglindore – si dhe me botën e artit në përgjithësi.

Edicioni i parë i rezidencës u zhvillua në resortin bregdetar shqiptar të Radhimës në fazat e hershme të pandemisë. Duke përfituar nga zbrazëtia e një vendi përndryshe të pushtuar nga turistët, pjesëmarrësit kaluan tri javë duke eksploruar zonën.

Skulpturat, instalacionet zanore, videot dhe tekstet që dalin nga kërkimi i tyre pasqyrojnë bashkëjetesën e frikshme të deteve dhe qiejve piktoreskë me gjurmët e epokës komuniste, paranojën e saj militante ende të gdhendur në peizazh dhe në kujtesën e atyre që atje jetojnë.

Ekspozita e punimeve u konceptua si “agjensi turistike” udhëtuese. Duke filluar me vjeshtën e kaluar në Tiranë, shou ndërkohë ka përshkuar Bukureshtin, Kluzhin dhe Radhimën, duke evoluuar ndërsa lëviz. Ndalesa e fundit në itinerarin e tij është Prishtina.