Alban Muja

Alban Muja (1980, RKS) prodhon video instalacione, filma, vizatime, piktura, fotografi dhe vepra arti publik të ndikuara nga proceset e vazhdueshme të transformimeve sociale, politike dhe ekonomike në vendin e tij të lindjes në Kosovë e në Ballkan. Përmes praktikës së tij, ai hulumton në tema të historisë dhe socio-politikës, duke i lidhur ato me qëndrimin e tij në Kosovë në ditët e sotme.

Ai ka shfaqur punë dhe ide në ekspozita të ndryshme personale dhe grupore, duke përfshirë festivale filmash dhe prezantimin në Pavijonin e Republikës së Kosovës në edicionin e 58-të të Bienales së Venecias. Në pavijon, ai prezantoi një video instalacion me tre kanale të titulluar “Albumi Familjar” që futet në kujtesën personale dhe kolektive të Luftës së Kosovës (1998-1999) dhe zgjon kureshtjen mbi rolin që kanë imazhet dhe mediat në ndërtimin dhe formësimin e narrativave, identitetit dhe historisë në kohë konfliktesh.