Ndërhyrje artistike – Sahej Rahal

Sahej Rahal është pikë së pari tregimtar. Ai ndërton botë mitologjike duke u mbështetur në burime të marra që nga folklori, filozofia dhe arkeologjia e deri në trilli shkencor.

Këto botë shqyrtojnë të tashmen ndërmjet kufijve të reales dhe të imagjinuarës. I konceptuar për Muzeun e Kosovës, instalacioni i Rahalit, Final Forest  [Pylli Përfundimtar], thur kundërmitologji kundër metafizikës përjashtuese të sistemit indian të kastës. Në të njëjtën kohë, ai imagjinon rrugëdaljet drejt një shumëllojshmërie të të ardhmeve të mundshme.

Duke përmbledhur video, skulptura, vizatime dhe programe të inteligjencës artificiale, tregimtaria e artistit ndërlidhet me narrativat e muzeut për civilizimin neolitik dhe rezistencën militante. Këtu, në ndërfaqen e të kaluarës dhe të ardhmes, Rahal orkestron një terren provë për bashkëjetesat dhe lidhjet midis formave njerëzore dhe jashtë-njerëzore të të menduarit dhe të qenit, inskenuar në kufijtë e mitit, makinës, mendjes dhe kujtesës.