Ndërhyrje artistike – Driant Zeneli

Tri ndërtesa brutaliste ikonike janë lokacioni për Trilogjinë Kafshët të Driant Zenelit. Na ishte njëherë… në kohën e tashme: Biblioteka Kombëtare e Kosovës në Prishtinë, Piramida e Tiranës dhe Posta në Shkup. Duke hetuar atë që ka mbetur nga arkitekturat utopike, secili film i trilogjisë bazohet në fabulën e vet në përpjekje për të krijuar imagjinata të reja.

Të portretizuar nga versione futuriste e robotike të vetvetes, protagonistët e kafshëve ndeshen secili me nga një antagonist të vështirë: peshku fluturues përballet me një peshkaqen, pilivesa me një oktapod dhe xixëllonja me një gjarpër. Si krijesat ashtu edhe rrëfimet e tyre janë zhvilluar në një proces bashkëpunues që është pjesë përbërëse e praktikës së artistit.

Në pjesën e parë, ai punoi me fëmijët; në pjesën e dytë, me një ish të burgosur; në pjesën e tretë me studentë të inxhinierisë. E përbashkët për secilën fabul të re është figura e ikjes – si mënyrë shpëtimi, qoftë nga shtypja, izolimi ose kurthimi, dhe si mjet metamorfoze e fuqizimi.