Ndërhyrje artistike – Christian Nyampeta

Christian Nyampeta prezanton Sometimes It Was Beautiful  [Ndonjëherë ishte bukur] në kinemanë e braktisur Kino Rinia. Një vend kulturor fantazmë, mezi i shpëtuar nga shndërrimi në supermarket, ai mbahet mend si vendi që solli filma aksion dhe romanca holivudiane në Prishtinë.

Puna e Nyampeta-s u frymëzua nga ideja e shkrimtarit dhe regjisorit senegalez të filmit Ousmane Sembène për kinemanë si vend i të mësuarit kolektiv dhe mjet për ndërhyrjen sociale.

Në film, një grumbull i pagjasshëm i njerëzve – midis tyre politikanët Yasser Arafat dhe Winnie Mandela, teoricieni postkolonial Leela Gandhi, dramaturgu Wole Soyinka dhe kineasti Andrei Tarkovsky – ndjekin dhe kritikojnë një film tjetër: dokumentarin I fetischmannens spår (Në gjurmët e doktorit të shtrigave), xhiruar nga regjisori suedez Sven Nykvist në Kongo më 1949.

Ndërmjetkoha midis ekranizimit njëorësh të filmit paraqet pjesë nga traileri i artistit për veprën e tij të ardhshme, Lovers in a Dangerous Spacetime  [Të dashuruarit në një kohë-hapësirë të rrezikshme]. Ulëset e kinemasë janë siguruar nga shumë njerëz të ndryshëm në Prishtinë. Secila ulëse sjell historinë e vet në takim.