Ndërhyrje artistike – Sislej Xhafa

Shumica e memorialëve bëhen të padukshëm me kalimin e kohës. Sado i rëndësishëm mund të ketë qenë tregimi i tyre dikur, domethënia tenton t’u mjegullohet dhe t’u zbehet.

Monumenti i dëshmorëve partizanë në lagjen Velania të Prishtinës është rast i tillë në Kosovë. I projektuar për të ndihmuar ngritjen e mitologjisë rreth rezistencës partizane në Luftën e Dytë Botërore, monumenti përbëhet nga një kompleks në formë ylli me një glob në mes.

Ashtu si obelisku trekëmbësh në qendër të qytetit, ai qëndron për “vëllazërim-bashkimin” universal. Që nga lufta e Kosovës më 1999, monumenti është lënë në hije nga shtimi i një varreze për ushtarët e Ushtrisë Çlirimtare të Kosovës dhe të varrit për ish-presidentin Ibrahim Rugova. Tani më shumë fushë lojërash sesa vend përkujtimi, statusi i tij kontestohet gjerësisht.

Brenda mureve të këtij monumenti, tani të rrënuar, për dëshmorët dhe heronjtë, Sislej Xhafa ka mbledhur elementët e një tregimi alternativ: një pompë jofunksionale benzine, një karrige, një karikues paneli diellor, një telefon mobil dhe një kujdestar të paguar. I titulluar frosted pocket [xhepi i ngrirë], tregimi i ri shpaloset gjatë 100 ditëve të Manifesta 14 në Prishtinë.