Vigan Nimani

Vigan Nimani ka mbledhur një arkiv të gjerë fotografish. Shumë prej tyre janë marrë nga librat, të tjerat i ka bërë nëpër udhëtime. Për një kohë të gjatë, artisti e shqyrtoi arkivin nga pikëpamja estetike, duke i përdorë fotografitë si burim për piktura. Këto janë të mirënjohura për përshkrimet e veçanta të arkitekturave moderniste, pezull mes figuracionit dhe abstraksionit.

Rrëfimet politike që pikturat e Nimanit po ashtu pashmangshëm tregojnë ishin të një rëndësie dytësore për të. Megjithatë, fshirja e shpejtë e trashëgimisë moderniste nën turbokapitalizëm ia ndryshoi natyrën edhe arkivit edhe veprës së tij. Tashmë jo vetëm depo e thjeshtë materialesh, arkivi është bërë burim vendimtar i kujtesës dhe qëndresës kulturore: duke kapur dhe ruajtur tensionin e harmoninë midis botës së ndërtuar dhe asaj bimore.

Vigan Nimani është piktor dhe fotograf nga Prishtina, Kosova. Ai është koleksionues i librave të cilat janë botuar në Jugosllavi përgjatë viteve ’60 -’70. Portretizimi i jetës së përditshme, fabrikave, arkitekturës, hapësirave dhe natyra e Ballkanit janë burim i pashtershëm frymëzimi për punën e tij. Shumica e skenave në pikturat e tij vijnë nga librat, katalogët, kartolinat dhe fotografitë e tij personale.

Përdorimi i fotografive të tij si bazë materiale për piktura krijon një urë mes realitetit të vështruar që hulumton format natyrore dhe shtresimin e ngjyrave dhe dritës në pikturë. Megjithëse puna e tij mban referenca të forta nga e shkuara këto frymëzime vizuale nuk janë asnjëherë të drejtpërdrejta.

Nimani lëviz referencat kohore nga burimet e tij fotografike: duke i prerë, bashkangjitur filtra dhe duke i manipuluar ato për të nxitur detajet dhe gjestikulacione, kësisoj duke krijuar një imazh të ri. Përmes kësaj, Nimani krijon një ndjesi të pakohshme në punën e tij.